کراچی اور سندھ میں بارشوں کی پیش گوئی: شہری احتیاط برتیں۔

محکمہ موسمیات نے کراچی سمیت سندھ کے مختلف اضلاع میں اتوار کی شام یا رات سے تیز ہواؤں، گرج چمک اور بارش کی پیش گوئی کی ہے۔ کراچی میں گزشتہ چند دنوں سے شدید گرمی اور حبس کا راج رہا، تاہم سمندری ہوائیں بحال ہو چکی ہیں۔ اس کے باوجود ہوا میں نمی کا تناسب بڑھنے کے باعث "محسوس ہونے والا درجہ حرارت" حقیقی درجہ حرارت سے ایک سے دو ڈگری زائد ریکارڈ کیا گیا۔

محکمہ موسمیات کے مطابق بارش برسانے والے بادل اتوار کی شام یا رات سے بننا شروع ہو سکتے ہیں، جس کے باعث شہر کے مختلف علاقوں میں ہلکی بارش یا بوندا باندی کا امکان ہے۔ یہ سلسلہ 22 اگست تک جاری رہنے کی توقع ہے۔ سندھ کے دیگر اضلاع جیسے تھرپارکر، عمر کوٹ، میرپور خاص، حیدرآباد، لاڑکانہ، سکھر، خیرپور، بدین اور جامشورو میں بھی گرج چمک کے ساتھ بارش اور بعض مقامات پر موسلا دھار بارش کا امکان ظاہر کیا گیا ہے۔

محکمہ موسمیات نے بتایا ہے کہ بحیرہ عرب اور خلیج بنگال سے آنے والے مضبوط مون سون سسٹمز اور مغربی ہواؤں کے باعث ملک میں مون سون کی شدت میں اضافہ متوقع ہے۔ بلوچستان کے علاقوں میں بھی 17 سے 21 اگست کے دوران بارشیں متوقع ہیں۔ شہریوں کو مشورہ دیا گیا ہے کہ وہ شدید بارشوں، ممکنہ اربن فلڈنگ اور سڑکوں پر پانی جمع ہونے کی صورت میں احتیاطی تدابیر اختیار کریں۔